di pippen84
Denominatzione: Casteddu de Acquafredda

Logu de riferimentu: Silìcua

Inditos pro b'arribare: dae Tàtari si sighit sa SS 131 finas a s'incrugadorzu pro Samassi e sighende sa SS 297 finas a Silìcua; dae Casteddu tocat de leare sa SS 130 finas a Silìcua.

Descritzione: est una testimonia de importu mannu de comente fiant istruturados sos casteddos e sos fortes in època medievale. A 4 km dae sa bidda de Silìcua est in unu cùcuru de orìzine vulcànica a 266 metros subra de su livellu de su mare.

Su casteddu est istadu fraigadu in su sèculu XIII pro sa defensa de cussa zona rica de minas. A parrer de sos prus, est istadu fraigadu dae sos pisanos Donoratico de sa Gherardesca, est a narrer dae sa famìlia de su Conte Ugolino famadu, su chi est istadu montovadu dae Dante in s'Inferru. Ma est istada agatada una bulla papale de su 30 de trìulas de su 1238, in ue su Paba Gregòriu IX daiat òrdine pro chi s'esserent postos in assetu de gherra totu sos fortes de sos zudicados de Casteddu, Gaddura e Torres e finas su de Acquafredda chi duncas deviat esser zai fraigadu dae su 1215.
Ruta sa Republica de Pisa, su casteddu intre su 1326 e su 1410, est passadu a sos Aragonesos e a pustis a àteros feudatàrios ma no est istadu prus abitadu.

Cun unu decretu leze de su 1993 su situ est istadu mutidu "Domo Andesitico di Acquafredda" e est istadu decraradu Monumentu naturale. Est interessante non petzi pro s'aspetu istòricu, zeolòzicu ma finas pro s'apetu paesazìsticu: dae sa punta si podet osservare totu sa prana a 360° dae su Cixerri a sos istàinos de Casteddu, dae sos montes de s'Iglesiente e a sos de sa Marmidda.