di pippen84
Si comente Tonino s’est postu a iscriere in sardu, e sa cosa m’agradat meda, lu fato deo puru, gai imparan sos chi naran chi unu professore no ischit comente faeddat su populu o sa sotziedade, comente naran sos sociologos chi ischin tottu (o pensan de ischire totu).
Deris sa politzia at iscutu unu bandzu a sos manifestantes: ondzunu podet pensare su chi cheret de s’ordine e da sa giustitzia, ma deo cando bio manganellos, catzottos, beccadas e ateru, no penso chi semus meda ordinados. Cando sas paraulas no serbin prusu a nudda e sa zente arribat a si corcare in mesu ‘e istrada; cando un omine es prontu a leare ciaffos pro si faghere intendere, cheret narrer chi sa politica no ischit prus intendere, ascurtare, dezidere chena cumandare.
No b’at niunu in Sardigna chi non cheret adzudare son napolitanos. E bisontzat los adzudare. Solu chi nois tenimos una ledze chi no lu permittit, ca non si podet portare aliga in Sardigna. B’este puru una chistione de cantidade: si sunu 600 t este unu contu, pruite sos inchisinadores bi la faghen a los brusiare; si sunu 6000 t cheret narrere chi bisondzat ‘nde fuliare unu muntone in sas discaricas, e deo non soe de accordu.
Si deo fia istadu a su postu de su Presidente Soru, aìa nadu a Prodi chi emmo, sos sardos sun prontos a faghere sa parte insoro, però chi tenìa bisondzu de bi faeddare, de lis ispiegare it’est cust’aliga, a ube la ponimos, ite cherimos faghere de s’aliga nostra ecc. ecc. Imbetze, issu s’est postu in conca, comente faghet sempre e comente hat fatu pro s’articolo 13 de s’Istatutu, chi no b’aìat de consultare nemos, chi issu bastaìat e avanzaìat. Custu est su puntu: Soru no hat cumpresu che a tempos nostros chie governat no cumandat: podet e depet detzidere, ma si depet ispiegare puru, debet convintzere, ispetzie candu si trattat de sa terra e de sa salude.
A sos chi naran chi nois no depimos leare mancu unu saccu de s’aliga ‘e sos ateros, mi benit de narrer chi si sighimos a pensare a sa Sardigna comente a unu cunzadu ube no intrat e no essit nudda si no cherimos nois, finimos totu cantos poberos, isolados e podet esse puru malaidos, ca si diat torrare sa moda de si coiuare tra fradiles! Unu tempu si naraìat ‘autarchia’, oe comente la cherimos cramare?
Bisonzat chistionare de su chi pensamos de sa sovranidade (bi sun zertos chi usan su termine ’soberanìa’, chi mi paret benit da unu ispanismu chi prus a tardu est intradu in sa poesia e in su ‘Babu nostru’, ube a Deus li naran chi est ’soberanu’; a mie no piaghet). Sovranidade cheret narrere federalismu. Oe s’emergentzia de s’aliga dimostrat comente s’istadu traditzionale no resessit a gubernare sa modernidade e comente sa reforma de su Titulu V de sa Costitutzione no siat zusta pro sas nezessidades difiziles chi s’Italia est bivende. Nd’amos faeddare crasa a su T Hotel.
Mi ponzo una dimanda: se in un su gobernu bi fiat istadu unu de FI o de An, a su portu de Casteddu chi bi fiat istadu? B’at de bi pesare, ca sa Sardigna non si defendit ind’una manera cando b’est Berlusconi e ind’un’atera cando b’est Prodi.
Como calicunu m’at a narrere chi no li agradat chi appo iscritu in sardu. Faghimos gai: oe faghimos su “Sardu day” e totus, comente nos benit, iscrivimos in sardu. Gai bidimos si non intendimos bene: sos campidaneses in campidanesu, sos logudoreses in logudoresu. Sos emigrantes chi no ischin faeddare prus in sardu, chi iscrian comente cherene, finza in inglesu o tedescu. A menzu biere!